“Problemi im nuk është shitja e peshkut, por pamundësia për të furnizuar klientët. Në një vit prodhoj 100 ton, ndërkohë që kërkesa është për 200 ton peshk në vit”, na shprehet Alberti nga Xhyra e Librazhit, sapo e takojmë.
Prej afro 12 vitesh, Alberti merret me kultivimin e troftës dhe aktualisht administron 30 vaska, duke punësuar në biznesin e tij 7 persona. Ka krijuar edhe zinxhirin me 10 dyqane, të cilët mbajnë markën e tij “Trofta Xhyrë”.
40-vjeçari furnizon mbi 20 dyqane dhe 40 restorante në Elbasan, Librazhd, Pogradec, e më tej, duke pasur si qëllim të vetëm shtimin e vaskave pasi tregun tashmë e ka të siguruar.
