Autoriteti Kombëtar i Veterinarisë dhe Mbrojtjes së Bimëve është njoftuar nga Policia Bashkiake e Tiranës për praninë e një çakalli rreth ambienteve të Teatrit të Operas dhe Baletit.
Ekipi i veterinerëve të Drejtorisë Rajonale të Veterinarisë dhe Mbrojtjes së Bimëve të Tiranës pas verifikimit paraprak konstatoi se kafsha ishte e qetë, pa jargëzim dhe shenja që mund të ishin dyshuese për infeksionin e tërbimit.
Veterinerët morën kampion gjaku për analizë dhe e dërguan në laboratorin e Institutit të Sigurisë Ushqimore dhe Veterinarisë, për të evidentuar nëse çakalli është bartës i sëmundjeve infektive të transmetueshme apo jo.
Kafsha do të qëndrojë e karantinuar në ambientet e Kopshtit Zoologjik deri në daljen e rezultatit të analizave ku do të bëhet dhe tabloja e plotë klinike e çakallit.
