“E dua punën që bëj. Kam pasur oferta të punoj në Tiranë, por refuzova sepse nuk mund ta ushtroj profesionin atje më mirë se në Lushnje, kryeqendrën e bujqësisë. Është tjetër gjë kur të orientojnë në këtë degë, tjetër gjë kur e ke pasion; është emocion i bukur kur ti arrin të shpëtosh një fermë në rrezik”, është përgjigjja që na jep Jetmiri, pasi e pyesim se përse zgjodhi të studiojë për agronomi.
Prej 4 vitesh Jetmiri i është bashkuar trupës së agronomëve të AKVMB dhe mbulon fermat në 7 Njësi Administrative të Bashkisë së Lushnjës. Sipas tij, bujqësia ka tendenca për t’u zhvilluar dhe duke marrë parasysh pozitat ku jeton, agronomia është profesioni i duhur.
