Andonin nga Sheqerasi i Maliqit e gjejmë në fermë, duke u kujdesur për 50 lopët e tija. Ka 12 vite që merret me këtë aktivitet dhe thotë se blegtoria nuk është një punë e lehtë, por të siguron të ardhura të mjaftueshme financiare.
Prodhimin ditor prej 5 kv e shet tek një fabrikë e përpunimit të qumështit dhe qëllimi i tij është që të shtojë numrin e krerëve.
“Të gjithë ditën e kam të lidhur me fermën dhe tokat që duhet të mbjell për të siguruar bazën ushqimore. Në çdo moment duhet të jemi të kujdesshëm sepse bëhet fjalë për gjë të gjallë dhe situata të del nga duart, duke sjellë pasoja për biznesin”, thotë 49-vjeçari.
Në fermë ka të punësuar dy persona të tjerë, të cilët e ndihmojnë edhe në mbjelljen e 15 ha tokë, të marrë me qira.
